الأكل الصحي وأولويات الإنسان | يكتبها (أبو راشد)

أبو راشد يكتب لنا في تدوينة بالعامية المصرية نصائح مفيدة لجسد بلا أمراض... أولها هو الأكل الصحي، الذي إن استمر كشيء أساسي، سيقل معدل أمراض الجسد

الأكل الصحي وأولويات الإنسان | يكتبها (أبو راشد)

الأكل الصحي

احتياج الجسم من الطاقة

لازم نفرّق بين أن انت تنزّل نسبة الدهون من جسمك، وإنك تبني عضلاتك..

عملية حرق الدهون هي عملية هدم Catabolism...

عملية بناء العضلات هي عملية بناء Anabolism..

وبالتالي؛ الجسم بيشتغل على عملية واحدة أثناء التمثيل الغذائي أو Metabolism.

كل جسم له احتياج من الطاقة للعمليات الحيوية؛ بالإضافة للأنشطة البسيطة اللي بيقوم بها.. مقدار الطاقة دي بتتحسب بالكالوري Calories، معظم الرجال والنساء بيحتاجوا من ١٨٠٠ إلى ٢٠٠٠ كالوري في اليوم، والطاقة دي بيتم الحصول عليها من عملية التمثيل الغذائي للأكل.

 

لو افترضنا إن فيه إنسان وزنه مثالي، ونسبة الدهون في جسمه طبيعية (١٢% - ١٨%)؛ وبالتالي لو أكل كل يوم من ١٨٠٠ - ٢٠٠٠ كالوري، هيأمّن الطاقة اللازمة لجسمه.. أي زيادة عن القيمة دي هتتحول لدهون في الجسم، وأي نقص هينتُج عنه حرق للدهون في الجسم..

وبالتالي؛ عشان تجبر جسمك إنه يعتمد في الطاقة على الدهون المُخَزَّنة؛ بتقلل الكالوري اللي داخل في الأكل عن احتياج جسمك
  (Calorie Dificit)، ودة معظمنا يعرفه..

المشكلة هنا؛ إنك لما بتعمل الفرق ده، جسمك بيدخل في عملية هدم Catabolism، وبيبدأ يحرق دهون، وتخسر معاها عضلات..

عشان كدة؛ صعب جدا إنك تنزّل دهون وتبني عضلات في نفس الوقت، دة عايز برامج تدريب فيها أحمال جنب الكارديو؛ لأن مفيش جسم هيقوم بعملية هدم وعملية بناء في نفس الوقت.

متابعة الحالة الصحية أهم من متابعة الميزان

موضوع زيادة الوزن الناس بتتعامل معاه على رقم الميزان، بغضّ النظر عن الصحة، وبالتالي يبدأوا يدخلوا في دايت قاسي، ويخفَّضوا الكالوريز عشان رقم الميزان ينزل، بدون أي اعتبار عن الحالة الصحية.. هل هي اتحسنت ولا ضعفت؟

دايما تحديد الهدف الصحيح هو أهم سبب للنجاح.. لما يكون وزنك زايد، أكيد بيأثر دة على صحتك، بدون ما نتكلم على الأمراض هتلاقي عندك مشاكل في التنفس مع أي مجهود، وآلام أسفل الظهر، وآلام الرُكْبَة، وتشوّه الظهر (تقوس الظهر أمامي أو خلفي)، وتراكم الدهون الداخلية في منطقة البطن وتأثيرها السلبي على الأعضاء الحيوية، وضعف كفاءة الدورة الدموية، وغيرها..

عشان كدة؛ هدفك الرئيسي مش إنك تنزّل وزنك على الميزان.. لا؛ هدفك هو تحسين صحتك، والتخلص من المشاكل الصحية المترتبة على الوزن الزائد..

وبالتالي؛ مقياس التقدم عندك هيكون هو مدى تحسن وضعك الصحي يوم بعد يوم، ودة هيكون دافع أقوى بكثير جدا من مراقبة رقم الميزان؛ لأسباب متعددة.

الدايت أسطورة

موضوع متابعة رقم الميزان هو السبب الرئيسي إن الناس تهمل، وتبطّل تشتغل على نفسها في تنظيم الأكل وممارسة الرياضة، لأن الجسم ربنا خلقه في ميكانيزمات دفاعية بيسخدمها في حالة النزول السريع للوزن، أو تقليل كمية الطاقة التي يحصل عليها من الطعام.

أهم نصيحة؛ هي إياك تعمل دايت.. أيوة مفيش حاجة اسمها دايت!!

الدايت هو سبب زيادة الوزن.. أيوه زيمبقولك كده.. مستغرب؟

إنت وزنك زايد صح؟

كم مره عملت دايت؟

كتييير...

طب ليه لسّة وزنك زايد؟

عشان عملت دايت.. دي الإجابة، وهقولك ليه.. اصبر على رزقك!!

كلمة دايت معناها إنك هتدخّل نظام غذائي استثنائي، وبالتالي طالما دخلت يبقى هتخرج..... بعد ما بتخرج بتعمل إيه؟؟؟ إنت عارف.... أكيد بتاكل التلاجة، وبتخلّص نص المنيو من بتوع أكل الديليفري اللي جنبك، وبتعوّض "حرمانك" فترة الدايت... وهي دي المشكلة.

الأكل الصحي وتغيير نمط حياتك

الحل هو تغيير نَمَط حياتك بالكامل في اختياراتك في الأكل، وفي ممارسة الرياضة؛ يعني تاكُلْ الأكل الصحي اللي إنت بتحبه، وركّز إنك متعدِّيش الكالوريز بتاعتك..

حافظ على برنامج الرياضة، وكُلّ شهر كدة بُص على قياساتك؛ عشان بس تعرف إذا كان نظامك صح، ولا محتاج تعديل!!

ماتِشْغِلش دماغك بوزنك، وتابع صحتك وشكل جسمك.

لو إنت في الثلاثينات.. نصيحة؛ إياك تدخل الأربعين بوزن زايد..

لو إنت في الأربعينات.. حاول تغيّر عاداتك بسرعة، قبل ما تضعف بسبب السن..

حتى لو عندك مشاكل صحيّة؛ لسة عندك فُرصة تغير.. ممكن تتخلص من أمراض زي الضغط، بالرياضة والتغذية الصحيحة..

ممكن تحسّن قلبك، وتقلل تأثير السكر..

ممكن تتخلّص من مشاكل كتير..

لسة فيه فُرصة..

 الأفوكادو

كان فيه حد اتكلم عن الأفوكادو؛ وإنه لما جابه، طلع زي الخيار..

الأفوكادو من أنواع الأكل الصحي؛ أولا هو مصدر نباتي للدهون الصحية.. ال ١٠٠ جرام (تقريبا نصف حبّة) فيها حوالي ١٢ جرام دهون، غير مُشَبَّعة (صحيّة)، وفيها ٩ جرام كربوهيدرات...

طيب ليه بقى طعمها زي الخيار؟!

ببساطة؛ لأنها لم تنضج بعد.. زي الموز بالضبط..

لما تجيب أفوكادو؛ نَقِّيه على حسب استهلاكك.. لو عايز حبَّة تستخدمها في نفس اليوم، يبقى لازم تكون مستويّة.. تعرفها ازاي؟

هتلاقي لونها بُنِّي في بعض الأصناف؛ بس تكون ماسكة نفسها، مش قديمة..

أو هتلاقيها خضراء؛ بس لما تدوس عليها هتحس إنها طريّة تحت ضغط أصابعك.

طيب؛ لو جبت كام حبَّه لسة جامدة؟

ممكن تلفهُم في كيس غامق، أو لفهُم في ورقة جوة كيس.. وكل يوم تابعهم، لحد ما يطرى الأفوكادو وينضج، بعد كدة شيلُه في الثلاجة وابدأ في استخدامه...

في ناس بتستخدمه على المشاوي والسَلاطات، وممكن تعمله مع العصير...

الهدف إنك تدخَّل لجسمك دهون صحية، حتى لو ملوش طَعْم.

معلومة إضافية عالسريع

احترسوا من سُكَّر الفاكهة (الفركتوز)؛ اللي هو موجود في السُكَّر العادي بنسبة ٥٠٪ زيادة...

دة تأثيرُه على الكبد زي الكحول؛ بيسبب تراكم دهون البطن الداخلية (Visceral Fats)، وبيسبب الكبد الدُهني، وبيزود التراي جلسرويود واليوريك أسيد في الدم... حاول لاتزيد عن ٥٠ جم في اليوم..

حاول متشربش عصير فاكهة لأنه مش ضمن الأكل الصحي، وكُلْ الفاكهة صحيحة، وإذا كُنت هتشرب عصير؛ اشربه مع وجبة فيها بروتين ودهون، عشان تبطّأ عملية الامتصاص، وتريّح الكبد.

اقرأ أيضا

كيفية تغيير شكل عربيتك ببساطة (الفاميه والجنوط) | (أحمد رَحْمة)

المرآة | كلميني.. إيه الكلام – سلسلة يكتبها (محمد جابر)

أفكار متناثرة عن الروح والجسد والعقل | كيف يستطيع العقل الانطلاق رغم إيمانه بالخرافة ؟ (بقلم: نور)

عن أساسيات واجب توافرها عند الحجر المنزلي للوقاية من كورونا | (بدون عنوان) يكتبه (علي صلاح)